واران
واران ئەی هێدیەو پەروەردگاری
ئامیانوو هانەو چەمەو جۆباری
نەواو شمشاڵوو وەرشاڵوو شوانی
مووسیقاو ڕۆحی، پەی ئێنس وجانی
چن وەشا وارایت نیمە شەوەنە
وەر جە بەربەیان، شیرین خەوەنە
چن وەشا خرمەو شەوە وارانی
ئامێتە چەنی خشەو خەزانی
خشەو خەزانی و دیاو دارانی
تێکەڵ بۆ چەنی خرمەو وارانی
هەوروو نەوپەڵەی دا بۆش سەرکەشا
سەحەر هۆر بێزی کەری تەماشا
ڕوو بە پەنجەرەو پەشت بە سۆبەوە
بە "کنالەیلێ گیان" هەر تا ڕۆ بۆ وە
بە واراو وەشتی سارا نمناك بۆ
موزەییەن بە فەیزحەی ئەفلاك بۆ
وەختێ نەو‌پاییز سارا بۆ نمناك
کام عەتر یاوۆ وە بۆی عەتری خاك
کام ساز و سەنتوور،نەی یا دیوانێ
یاوان بە نەواو خرمەو وارانێ
چن وەشا پاییز جە لا دەگانە
چەنی ئازیزی گێڵێ باخانە
گەلە بزنۆوە لالۆو شوانەی
ڪتریەسیاوە کەرۆ لاو شانەی
شمشاڵە کۆنێ بنیەو لاو شاڵیش
گۆچانوو دەسیش بدٚۆ لاو باڵیش
ژیوای ئانەنە ئادٚی ویاران
نەك چوون من بە کۆڵ خەمم وناران
-----------٭٭٭٭٭٭-----------
#سوهراب _مورادنیا
درباره این سایت