ههنار مههدی لالۆ حمهمرادی!/داریوش رەحمانی
ههنار
مههدی لالۆ حمهمرادی!
مهکیانه پهی وێت پووکاڵاوی. مهگێرهیچ ئهو دڵ. پووکاڵاوی هیچ ئهگهر ئاو و بووڵاویچش ئهو سهر بۆنه دیسان پهی ئێمهمانان و گردینو ئا کهسانه که ڕاس و ناڕاس ئانهن بییهو بییهیشان جه گرد چێوی وهشتهر و مانادارتهرهن. ئهئی وهرێسێ بنهڕاو دنیایوه بنجهش یۆنه ههرچهنده به دیم و ئهوهگێڵنای جۆراوجۆرێشوه: دیدهو وهرانوهری نهئیشۆنه خاستهرهن. وهلێمکهتێ ئهپاسهیچه نییهن یهکسهر که تۆ لواینی و مهلینه پهیش. ئانه چه خییاڵهن تۆ وینانت. چهنی دڵ و دهست ئامان و مهینه. ههنار ههنارهن. ههر جۆر بۆنه ههراڵه، چهشکه و وینایش دایمهو خودای وهشهن و بییهو نهبیهی ماوهرۆنێوه ههلهکێ. تورش و شیرینش. ئیسه نهخوازهڵا ههنارو دهرهقووڵهکهو لاپاڵو رۆخانهی، دماو وهشتو وارانو خرمهو دڵیی. ئیتر پیشیایش باکهتێ بمانۆنه. بنیهره ئێمهیج نهواچمێنه و ئادێچ نهگێرانێش و نهگێرتهبۆشان ئهو وێشان و نهلوابۆنه ئهو مل و دڵ. مهپهشۆکیه. به یهقیین، کهردهنش، کهردهنشان، مهکهرانێش و مهگێرانێش. دڵمان بهینه و نهینه زووهن کهردێنێشان به ملهوانێ و ملهوانێشان. تهنیا ئانهیچه نه که واتێبێت و واتمان و واتت ههی هوو بهڵکووم گردینشان و هینهو گردو عهشیرهیچ، به تایوهت پهتاڵ پایهکان. ئهسڵهن ئادێچ نهبانێ وهیلانێ و دڵ سۆتێ و پووش جهستێ ههر ههنێ بگێرانێشان ئهو وێشان و بنجهو مانایشان. وهیڕۆ و لچگایش نییهن و نهگهرهکهن. چهمو ئهمن و تۆ تهنیا دیارگاو دنیای نییهن. تا قامی قییامهت ئینه بهزمشهن و بییهن تا بییهن. ههقهن و وهشیچهن ههر کهس به حهز وێش دنیای بووینۆنه. وێم ههنان و نهبهزیچ مهزانۆنه بنارو کراویهدۆڵیاوهلای و گردو ئی دهره رۆزگارانه به خییاڵ ههرکهس ههرچێوش واتهبۆنه کریان و بییهن به گهردهنبهندهو ملێ و دڵیی. به شانازیوه و بێ جیاوازی. باوجوا فرهشان ئهوپهرو بێعاریچوه و دهمو بێعاراوه ڕازیایبانێوه و واچیایبانێوه.
درباره این سایت