سوورەهەراڵە
سووره هەراڵه، سووره هەراڵه
سووره هەراڵه، وەش كەیفی حاڵه
پەی چێش ڕەنگی تۆ هەر سوور دیارەن؟
ڕەنگت چوون یاران وەك شای وەهارەن
وەختێ ئێد شنەفت سووره هەراڵه
واتش ڕەنگی من وەش كەیفی حاڵه
«دایمُ الاَوْقات» جه وەتەنو وێم
نیشتەناو خەریك شەوقو زەوقی وێم
نەپای «وەرواوان» وەختێو من مەو بەر
ڕەنگەم سەوزەنه نەڕووی «وەركەمەر»
ئینجا جه ناگا سەیر كەروو جه دوور
دیارەن باڵاو یارەكەیم چوون نوور
وەختێو ئا یاره نزیكم مەبۆ
لاو سەرەیمەنه تێر سەیرم كەرۆ
بوێو وەشه مەگنۆ نه سەرەم
ڕەنگەم سووره بۆ زوو به خاتر جەم
پی ڕەنگه ڕەنگم به سوور دیارەن
سووری ڕەنگی من جه سایەی یارەن
كەچی جه ناگاه چەرخی پوڕ ستەم
منو ئازیزش جیا كەرد جه هەم
هۆرێزا لوا پەرێ یانەی وێش
منش كەرد بێ ناز، خاتریش پەرێش
رەنگەم هۆر گێڵا جه ڕەنگی وەڵین
دڵم ماتەم بی، بێزارو خەمگین
گرەوام فره جه داخی گەردوون
هەرسۆ چەماو من جه حیساب بێروون
پاسه زانێنێ یاری وەفا دار
ئەر دووریش گنۆ مەگێروو قەرار
كه ئاده لوا بەبێ بەهانه
هەرسۆ چەماو من ئاما چوون هانه
«سەیدی» خۆ جه داخ بێ وەفایی یار
چی سەرزەمینه نیەنش قەرار
#سەیدی_هەورامی
درباره این سایت