تاتەڕۆ چی شارە ژیوای چن گرانا ! تاتەڕۆ
شار مەردەن ئانە وینیش،قەورسانا، تاتەڕۆ
جیا هەڵۆی قاڵاو منیشۆ قەدٚ چناری، قاڕقاڕ
ساڵهان چێ وشکەساڵی و پیاقڕانا تاتەڕۆ
چێش هەن چینەی جەحەنەمتەر خودٚا ڕاسەن درۆن!؟
ئانێ واچانێ بەهەشت،حەدس و گومانا، تاتەڕۆ
دین،واچۆ چڵکوو دەسیا ماڵوو دونیای پەوکەتەی
لێ دە یانا هەشتما بێ خان و مانا تاتەڕۆ
فەلسەفەو دینی ئەگەر پەی حەججی یا ڕۆچێ و نماین
پەس موسڵمان و مەرامش ئەردوغانا تاتەڕۆ
ئێمە پەی ڕاموو گەلەی هەفتا گەماڵێ جەم کەرم
خۆ گەلەو کافرستانیش بێ شوانا تاتەڕۆ
کەس نیا چراوێ بدٚۆ،من کۆ ملوو پی سورعەتە
جادە یەکسەر هەر پولیس و پاسەبانا تاتەڕۆ
باخ پەی ساحێب زەڕ یا شیک پووشین مێوەکەش
ئانە لێباسش هەڕینا ،باخەوانا تاتەڕۆ
زلێ حاسڵ جە دەفنوو ئایروو سینەو کۆڵبەرین
چیروو پایما هەر گڕ و ئاتەشفشانا تاتەڕۆ
زەڕ بیەن بابەو نەزان و ئەحمەقی بێ فایدٚەی
قابلی زانا بە ئێجبار بێ زوانا تاتەڕۆ
پا سەروو نەفتێ بە کۆڵوو هێزمێ ساکێ دیەن
یانەما سەردەن گڕێچ پەی دارسانا تاتەڕۆ
شێعرە عەشقێوەش نەبۆ لێ ناعێلاجی شێعرەنە
"سەیێدٚ"هاوارت نەلۆ ! بارت گرانا تاتەڕۆ
#سەیێدٚرەحمان_مەحموودی
درباره این سایت