کەلەبەروو شێعرا(۱٤۰)
کۆڵەکەم بنیەیدێ قەورەم گردٚ خەمێنێ، با مرا
فرسەتەن تاکوو جە شانەم گردٚ جەمێنێ، با مرا
چێگە بسراوندێم،بەڵکوو گرم و قاڵی نەژنەوو
چی سەرۆ تا چەم مەوینۆ هەر تەمێنێ،با مرا
ئاورای وینی، نمەتاوی عاشقوو نانی نەوی
ئەر خەمت نانەن،فرێنێ یا کەمێنێ، با مرا
عاشقی ڕەنجەن،نەوینی تاموو ئاواتەو دڵی
لێ دەگای پەڕ بۆ وەلی، چوون بێ شەمێنێ، با مرا
تۆموو ئاواتا، وەهارێ چێگە شانام و لوان
ئەر بە زەردٚی کەوت سارا و ئەر سەمێنێ، با مرا
چی سەرۆ زقمێوە ڕچیان ماتڵووڕۆجیاری بوو؟!
ئەی بە شەڕ کۆست مرۆ ڕۆ ، وادەمێنێ، با مرا
ئنە تەرسوونە دزێ بەی،قاڵیەو مزگی بەرۆ
تووتەکێ شاریچ وتێنێ و بێ دەمێنێ، با مرا
بازە با بووسوو بە قەقبەو بەش خەوەر بوونۆ،سەوای
شێعرەکێت"سەیێدٚ"جە ئاخ و مەرهەمێنێ، با مرا
#سەیێدٚڕەحمان _ مەحموودی
زمسان زریکناش
زۆقم
هەنگامێش ڕەقوە کەردێ
باڵاو ڕۆحێش
کەفەن کێشا
چەمێش وراستێ
بە تاپۆرە
هەرتا
تاسە نەحەسیۆوە
خنجەرەو
برایەتی شاخی
کێلانە ترازیا
یەخێ نانیش دڕیەرە
و
جلوو ئاخیش
وراست کۆڵەرە
ئاخیەتەر و
خەمیەتەرش کارەنیا کەرد
سفرە وناڵین
بابۆڵێ
پەی بابۆڵێ پەلەقاژێ !.!.
لاقەراخ و شاریوە
زریکەو
ئەڐایەتەر
کۆڵبەریەتەر گۆچ مەکەرۆ
هەرتا تەتە و
ئاغەو ئاغا
بێ خەم کەرا
ڕاوەو نانی !!
جەواد/ فێــــــراق ۲٨؍۹؍۹٨
گیانێوە پەی نانێوە!
شارۆ
۹۸/۹/٦
ــــــــــــــــــــــــــــــــــــــــــــــــــــــــــ
تەتە ئیتر
مەجمنۆ چەم پەی تەماشای!
سیروان
دڵش مەراق خێزا و
هەڵەبجە
چرکەچرکەو وەرزاو ساڵێ
چەمێش سەرچەمەو سەماو هەڵسانێ
ئیتر چێولای
وەروەیچ گرەوۆ پەی کۆڵبەری و
وێشەرە پێچیۆ تا ورد بیەی.
ونی سۆچۆ
هەنگام هەنگام و
شەرم مجۆ
لچێشەو نان!
چێولای ئیتر
کامە گەشتیارا
پەنجە کێشۆ پەی هەڵەبجەی
وەختێوە کە
سەی سینەو هەر تەوەنێ
بێ ناز کەوتەن کۆڵبەرێوە؟!
واچدێم سا دەی
کامە تاتەن
کامە برا
کامە ڕەفێق
کامە لالۆ
یا مامۆزا
سینەش کەیلوو مەراقی نەبۆ؟
چێولای هەر وەخت
عەزموو تەتەیت جەڕ دا پایا
بن کڵیشوو هەر تەوەنێ وستەت بنێ
نامنەرە سەرە
و
نانێ بنیەرە.!
#شارۆ
درباره این سایت