کەلەبەروو شێعرا(۱٤٦)
(من و خەمیار)
دڵێو کە ئەشقی ئێمزا ڪەردە بۆ
مشیۆ وەهارش گـــەڵا زەردە بۆ
کاروانوو دووری ڪەردە بۆش کارێو
گردوو دڵوەشی بێ ڪەس مەردە بۆ
چە سەختا یاوای ئاسانەو چەمات!
وەختێ ســەرتاپام چێگه دەردە بۆ
سەختا دیدٚارت حەرام کەریا پەیم
ئینە ڕازەنــە با نـە پــەردە بۆ!!
تاڵێو چا زڵفا بەش دەیش شەماڵی
تاکەی دڵ پەی تۆ وێڵ و هەردە بۆ
----------٭٭٭٭٭----------
#خەمیار_هەورامی
دڵێو کە بە ئەشق ئێمزا ڪریا بۆ
شەهادەو وەفایش وەنە دریا بۆ
گەنجوو دڵداری ، زاڵمان ئاسا
بە دەسوو چەتەو دووری بریا بۆ
ئەرسەدٚ سەخڵەت بۆ دیدٚاروو چەمات
دەروون بە شەراو دووریت گریا بۆ
ئەگەر بە یاساو بێ عەداڵەتی
مافم پاماڵ بۆ ، هەقم وریا بۆ
سەدٚ ئەننەتەریچ لوومەم کەرانێ
تەپڵوو ڕسوایم نە عام زڕیا بۆ
فیراقوو دووریت ڪەردە بۆش کارێ
ئاسانەو تاسەیم تەمام وڕیا بۆ
ئەر"سیاوکام"یچ (خەمیار)ران ئاسا
بە داموو توغرایت ئەسیر ڪریا بۆ
مادام تۆم هەنی دڵوەشنا پەنەت
ئەرسەدٚ جە دووریت جەرگم بڕیا بۆ
#سۆهراب_مورادنیا "سیاوکام"
۹۸٫۱۰٫۱۷کۆچی ڕۆجیاری
گیان مەسپارە
پەی ئەولاو هەسارا
سەرە نامنەرە و
لکە زەمینی!
#شارۆ
٥ـ۱۰ـ۱۳۹٨
درباره این سایت