کەلەبەروو شێعرا(۱٤٨)
بە هەرچێویە گرەگاو باوەڕیتانەن ، قەسەم
تەنیا دڵوەشیم ویریە جە شێعرەو دوێ چەما بێ.
یادگایە تا ئەودەسو سەبای
وەهمش مەوانی ، بوانە
باوڕش مەزانی ، بزانە
ئەرێ تەنیا دوێ چەمێ.
کارم بە بارو کەسیوە نەبێ
بەڵام سیەکام جە هەواو ئەئی وەرزە نەگبەتیە هۆرمەلوشانێ
چێش کەروو
ئەر هەناسەم بوەو بەنزینی مەدەو
ئەر سەرو سفرەیمەوە قەواڵەی وشک هەیبەتو باتۆمیەنە قەپێ مەشانۆنە کاکیلەیم.
ئەر هەرەسەو شەرمساری قارەمانە قەڵبەکاو تەتەی ،شێعرەو شاعرە ڕەزیلەکانە تا بندەرەو کفری مەهاڕۆم.
ئەر گەمەو پەهپادەکا و موشکەکانە چەکەرەو ئاشیلەکا مەدەمیانە و مامەڵێ مەکریانە
ئێمەیچ چێرو پایانە
نا
کارم بە بارو کەسیوە نەبێ
هەڵای تەم و لێڵی بێتینی چەمەکامەنە ،دوێ چەمێ چەودەسوە کەرێناوە چەم.
ئارۆ
ئارۆ
تاکو ئارۆ
گەڕیە گەورێنە ئینکار کریایمێ
پووش تانێ مەدەونە سۆکیم.
هەننامەکام جفت گرسای و دلێبەرەو ئینسانینە زەننۆڵێوە مەڕیانی
سەرەم هۆربڕنا
دوە چەمەکێ بیەبێنێ بە دوێ داڵانێ تاریک و خۆفناکێ ،دەمشان دڕیرە
تا بنەو شەرمساری تاریخی
تا ئەودیمو مەرگی
قوتشا دانی.
#مەهدی ئەبری
دڵ چننە پەرسۆ لەیلەکێم مەیل و دڵت چی ئاس جیا؟
تۆنی هەراڵەو باخەکەیم بۆ سەرچڵت چی ئاس جیا؟
گردوو شەوێ مجیۆ دڵم، یەڵداو خیاڵوو بێکەسی
ئازیزەکێم گەرمی دڵی قوڵبەقوڵت چی ئاس جیا؟
شاروو غەریوی چێش کەری قاڵاو موانۆ لالەزار
شێعر و عەرووزم وێتەنی دەی بوڵبوڵت چی ئاس جیا؟
وشکا چەمەو ئاواتەکام بۆرێ هەراڵەو حەسرەتام
خاکوو ئەوینی و ئارەزووی پەڕحاسڵت چی ئاس جیا؟
کەپرەو هەواروو خاترا هەرچی دیا نەویەی دیار
یانەم دەمێو کاول بیەن سەرمەنزڵت چی ئاس جیا؟
زەردا بزەو زەردی لوای، سەردەن دەمەو چۆڵی دڵی
هەو لەیلەکێم جەرگی برێژیا و وڵوڵت چی ئاس جیا؟
نام و نێشانوو تۆ مەنەن یانەو خیاڵوو بێکەسی
شێت و هەراس و بێ خەوەر ناغافڵت چی ئاس جیا؟
#فه‌یسه‌ڵ هێدایه‌تی
درباره این سایت