(میرزای خیاڵ خام)
میرزای خیاڵ خام ، خیاڵ نە پـوختە
خەرمانەی عێرفان بە خیاڵ سوختە
تا کەی بە خامی عــــــــومرت ویاران؟
پوختەگیت هەرگیز سەرەنج نەد٘اران
کوورەی عەقید٘ەی ئیمان و باوەر
بجۆشۆ دەروون وێنەی سەماوەر
هەر بەیان،بەیان ئارەزوومەند٘ی
خێتاب ئاما لێم بە ئەرجومەند٘ی
شەوناڵین چەنی دوعای سوب سەحەر
کلیـــــــــلەن پەرێ ئاوات بەشـــــــــەر
چەند کەس بە زاری بە مـــەقسوود٘ یاوان
بێ دەلیل پەی خەیر هیچ کەس نەتاوان
وە بێ ئیراد٘ەی ئەمــــــر خود٘ایی
مویەسسەر نیەن رۆی ڕۆشەنایی
عومر توولانیم چوون شەوی دەیجوور
دایێم زوڵماتەن مــــەحروومەن جە نوور
سەرچەمەی چەمان بە تاو مەڕێزۆ
نە جیاتی ئەسرین هووناو مەڕێزۆ
باخــــــەبەر جە حاڵ زامد٘اران دەرد
غەیرجە تۆیاڕەب کێ هەن دەواکەرد؟
دەردێو وێت دانت دەواش جە لای تۆن
تۆ شەفا نەد٘ەی شـــــەفاودەرد جە کۆن؟
حەکیمی حازێق دەردی نیهانیم
فەرەح بەخش دڵ،ئارام گیانیم
یاڕەب من پەنام بە تــــــۆ ئاوردەن
هەرچەند خەتابار ناد٘انیم کەردەن
(سەعد)شەرمەندەی کرداری وێشەن
غەیر جە پەنای تـۆ تەدبیرش چێشەن؟
#میرزاسەعدوڵڵاهەجیجی
سەفەر
بەینوو ئێمە و تۆ، خود٘ا،یەک پەرد٘ەن
ئاد٘یچ ئانەنە ، کە واچا مەرد٘ەن
لاشە دنیانە پێسنەن قەفەسێ
کە ئاستت جیا کێشی نەفەسێ
ڕۆحت ئازاد٘ بۆ گێڵۆ باخارە
ئێتر مەوڵاویۆ دەرەو داخارە
ڕۆبە کۆ و ئەشقی باڵ و پەڕ شانۆ
نامێ دڵداری و سوبحانی وانۆ
لا ئیلاش واتەن خالێقش باقین
ڕۆحش مێمانی شەراب و ساقین
مێمۆریش تا سەر پەڕ جە دەسمایەن
ڕەسوول موقتەدا،ئێد٘ وێنەی سایەن
وەڵ چانەی بلی وێت تەنزیم کەرە
حەیفەن بێ سەنەد بزەینە بەرە
یا پاکی، یا خەیر، تەوبە ڕاتەنە
ئەگەر نا دۆزەخ ئاویر گاتەنە
#حامی-غەریبی
درباره این سایت