سیاخان/بێهرووز موحەممەدپوور( شارۆ)
۹۸/۱۱/۲۷
ـــــــــــــــــــــــــــــــــــــــــــــ
سەردەموو کەریم خانوو زەندیەنە پیایێوە سیاوڵە، کەڵەگەت و زۆردار شیرازەنە ژیوێ کە دلێ خەڵکینە بە نامێ "سیاخان"ی شۆرەتەش وەرکەردەبێ.
وەختێ کەریم خان گەرەکش بێ بازاڕوو وەکێڵی وەش کەرۆ، سیاخان یۆ جە عالتەرین کرێکارەکاو ئا دەورانی بێ. چا وەختەنە چەرخوو نەقالەی و کەرەستێ وەڵکەوتێ ئارۆیانێ پەی هۆردای سەروو کەل و پەلوو بیناسازی پەی تەبەقە بەرزەکا نەبێ.
پی بۆنەوە بەنایێ و مێعمارێ ئەوەجەشا بە کرێکارانێوە کەڵەگەت و زۆرداری بێ کە بتاوا کەرەستەکا گێرا کۆڵێوە و بەراشا سەر.
وەختێ هەرمانەو وەشکەردەو بازاڕوو وەکێڵی دەسش پەنە کەرد و نۆبەو چنیەی خشت و ئاجۆروو تاقوو بازاڕەکەی یاوا، سیاخان تەنیا کەسێوە بێ کە تاوێ تا بەرزایی دە مێترا فڕەشا بدۆ و ئۆساو مێعماری و وەردەسەکاش ئاجۆڕەگا هەواوە ئەڕفانێنێ و سەقفوو بازاڕەکەیش پەنە وەش کەرێنێ.
ڕوێشا کەریم خان پەی تەماشەو وەڵکەوتەی هەرمانەکێ ، سەرێوەش دا بازاڕی و دیش کە جە دە ئاجۆرێنە شش حەوت دانێشا مەیاوا(نمەیاوا) دەسوو مێعماری و گنارە واری و مەڕیا.
کەریم خان جە "سیاخان"یش پەرسا:
چێشتا، ئجۆ نانت نەواردەن؟!
وەڵتەر حەتتا یەک ئاجۆرەت هەدەر نەلێ و گردی یاونێنی دەسوو مێعماری!
سیاخان بێدەنگ بی و هیچش نەوات، بەڵام مێعمارەکە ئامارە واری و هێور بنەو گۆشوو "کەریم خان"یرە چفناش:
قوربان تەماموو زۆر و قۆرەتوو "سیاخان"ی و دڵگەرمیش ژەنەکێش بێ. چن ڕوێن کە ژەنەکێش تۆریەینە و لوێنەوە یانەو تاتەیش. "سیاخان"ێچ دەس و دڵوو هەرمانێش نەمەنەن، ئەگەر چارێوە بە حاڵیش نەکەری، هەرمانەکێما ساڵێوە گنۆ دماوە!
ئاد تەنیا کەسێوەن کە متاوۆ ئاجۆرەکا تا بەرزایی دە مێترا فڕە بدۆ.
کەریم خان ئازا لوا پەی یانەو هەسوورەو "سیاخان"ی و ژەنەکێش ئاردەشۆ.
دماو ئانەی کیاناش شۆنی سیاخانی و وەختێ یاوا یانە، بە وینای خاتوونێش جە وەشیێنە پێسە زاڕۆی دەسش کەرد گرەوای!
کەریم خان بەعزێو زەڕش دا پەنە و واتش: ئارۆ کە لوا، بەڵام سەوای گەرەکما "سیاخان"وو هەمیشەی بی.
ئینەشە وات و ژەن و پیاش تەنیا ئاستێوە.
سەوایشۆ کەریم خان لوا پەی سەردای بازاڕی. دیش سیا جۆرێوە ئاجۆرەکا فڕە مدۆ کە جە سەرەو مێعمارەکەی ترازیا!
ئاوەختە ڕوەش کەردە دەوروبەریەکاش و واتش:
ویندێ ئەشق چ قۆرەتێش هەن؟
ئانە ئاجۆرەکا فڕە مدۆ ئەشقا نەک سیاخان
ئینسان پەی هەر چێوێ مشیۆ ئەنگێزەش بۆ
تاریخ ایران با لطفعلی خان زند
فضای مەجازی
درباره این سایت