کەلەبەروو شێعرا(۱٥۹)
پەی کاک جەماڵ قادر پووری جه زاوەر
دزاوەر مەکان جەماڵ قادرپـــوور
سڵامـــت چەنه، جە دۆڵاوی دوور
بەشش نەبڕیۆ خودٚای تاقـــــــانــه
پەڕ گوڵش کەردەن ئی هەورامانه
الحمـــــــــــدلله هیچ کەمش نیەن
تا وێنەو تۆش هەن خۆ غەمش نیەن
رانتاوە ئا هــــــــەورامانــــــــــه
به نەسر و شێعر و سیاچەمانــــــه
تۆ و کاک هومایون به قەڵەمی ساز
ئوسمان نه بێرواس وزدێوە پەرواز
با منیچ بــــلوو هامنــۆی ســــەردار
چڕوو ئا خەڵکا کول کەپر و هــەوار
بلمێ بارمێنه چنــــــوور و کوڵاڵاش
پەی دەسوەشانه کەرمێتان شاواش
قووله گنۆرە هــــــــــانه قـــــــەڵاوا
دەک ئاوەدٚان بی دزاوەر مــــــــــاوا
هەزار چوون جەماڵ چەنەت گناوە
هومایونێ گەل گەل بیا جــــه ڕاوە
جه ڕووی ئێلــتێفات چڕا "رێبوار"ی
شناسیاش کەرا چـــەنی ئەشـــعاری
#نەسروڵڵا کەنعانی(رێبوار)98/12/07 سنه
جوابوو کاکەجەماڵ قادرپووری
سڵام و ئەدەب و ئێحترام خزمەتوو کاکە نەسروڵڵای ئازیز و وەشەسیای٫ لوتفت فەرماوا و سەربەرزت کەردانێ و مایەو شانازین پەیم یادت کەردەنا.
زاوەر شاعێر و ناسک خیاڵێ پێسەو حاجی جەمال مەنووچەری،کاکە هومایون موحەممەدنژاد، کاکە هومایون نیکڕەفتار، کاکە فەرید ئەحمەدی، کاکە ئەحسەن قادرپوور و .یش هەنێ و من لایق بە مسیاری و شاگردی هیچکام جە ئا ئازیزا نیەنا و جەنابت سەربەرزت کەردەنا
دیسان سپاس
هەزار جار سڵام ئەی دۆڵاونشین
یانەت بۆ ئاوا و ناحەزێت حەزین
دڵ پەڕ جە شادی و کەیف و سەفا بی
دوور کەوتەی خەم و جەور و جەفا بی
نەک من بەڵ هەزار چوون من غوڵامت
سەد هەزار ڕەحمەت بە ویر و فامت
بکیانە تۆزێ جە خاکوو پاڵایت
تا دڵ لایق بۆ پەی کاڵاو باڵایت
#جەماڵ قادرپوور
درباره این سایت