کورۆنا
هەرکەس بەشوو وێش دنیایوش دیەن
زانای قەدٚیمی ئوستادش بیەن
نەکەردێ خیاڵ فکر و وەسواسی
هاوارمان خودٚان بە سێدق و ڕاسی
پەنا بە خودٚای جە شەڕی ئێبلیس
نەجاتمان بدٚۆ جە دەردانی پیس
فەریادٚڕەس خودٚان حەکیم دەلیلەن
جە نەزافەتی کورۆنا زەلیلەن
پێسە ویەردەن دەورانوو دنیای
دنیای مەینەتبار خەم پۆنە شنیای
زەمانەی قەدٚیم پەی یادگاری
چننەها دەردێ دانشان دیاری
دەردێ هەر هەنێ قەدٚیمیا واتەن
تاعوون و هەڵوێ گردش مافەتەن
دەردە باریکێ و سوورنجێ و پەتا
بەڵا بێنێ پەی پیر و نۆخەتا
دڕەیلێ و خەرکان یام بە خەرەفیای
باسشان کەردەن وەختوو سەرجریای
ها ئیسە قەڕنەو کورۆنای ئامان
تێکش دان وەزعەو ژیوایی و سامان
عاڵەم گرد کەوتەن مەهلەکەو دنیای
دووربای سەرش دان سەروەنەشێویای
هەرچننە باروو خودٚای حێکمەتەن
بەڵام زەمانەی عێلمش ڕەحمەتەن
حەکیمان کەوتەن کەشماڵ و دەوای
عەلاجش کەران ئارۆ یا سەوای
جە نائومێدٚی زەننەقتا نەیۆ
شەوێ تاریکە ئێنتهاش مەیۆ
ئیرادٚە جە لای خودٚای ڕەحیمەن
عەبدش سەبوور بۆ ئەجرش عەزیمەن
#عوسمان ڕەحیمی(مورید)
درباره این سایت