فەتە وەروو کرۆنای یانەنە نیشتەنەرە / وه‌لی فه‌تاحی
خۆ دروێشا نەدٚاینە:مەرگ چەنی هاوماڵی چەژنەنە. ئینە ویس ڕوێن کەس نەزیانەرە، گجارا عەبە وەروو ئانەیە بلۆ چێوێو بسانۆ ملۆ بەر و هەر پێسە ئاوی بارێ پەی ئاێرە مەلێ ئازا گۆج و گوڵ مزیۆناوە دلێ بەرە. ئندٚە نەفەسێوە دەی جگەرەی، ئیسەر و ئەوسەرش یۆن. ئەجۆ کەوتیش کەوتێنێ وەنە و تارشا نیان. نە هەرمانە مەنەێنە و نە کاسبی. سەرەو چوارقەرانیچما بێ، ئادٚیچ خەرج بی. خوڵە سەرەو ئانەیەر زەڕی پاشەکەوتش نیا. ئندٚە دەسێچما شۆرتێ پۆسوو دەساما لوا. لالۆ حەمە ماچۆ پێدٚا بیەنا تائیسە ئنەو ئی مانگێ سابوون کاریم نەکەردٚەن. دنیا بۆ بە سابوون و تایێد بەش نمەکەرۆ. دەی خۆ هەر ئینە حەسێب نیا نەزیەیەرە. دەی ئاوێوەما گەرەکەنە، نانێوما گەرەکا. هەر دەمکەراوە ماچا مەزیەیدێرە. مەزیەیدێرە. دەی یانەتا ئاوەدٚان بۆ ئانا مانگێو تەریچ نەزیایمێرە، ئەی زەڕ چکۆ بارمێ، خەرج و باجما گەرەکا. خۆ خودٚا مەکەرۆ کڵاوڕۆچنەرە پەیما. ئینەنە ماچۆ:دەردٚێوە ئاما گراڵەی بەتەر. بە گەدٚایی و نەداری و گرانی ساچێنمێ ئانا ئەچی دوورەو ئی نەدٚامەتیچا پەی تایێن بی. ئادٚێ کت و تووتە مورا، مشیۆم ئێمە تاوانش دەیمێ. خودٚا بە خشوش مامام واچێ: بەدٚەی بەتەرینە خرابەنە. ئێمە واچێنمە: دەی چینەیە خرابتەر و بەتەریچ هەن؟ واچێ: ڕۆڵە گیان ئەرێ هەن، شمە چێشتا چەم پەنە کەوتەن و چێش مزاندێ، زاڕۆڵێ هیزیەندێ. واچێ: سپاو ئینگلیسی و رووسی وعۆسمانی گێریایبێنێنە یۆ. دنیا بیە بێ ئایری سوور و قوری ژیا، وڵە مڵە پەی خەڵکی بیەبێ بە قەیسەری. عەسکەروو عۆسمانی زیاوە ئا پەشتەو «سۆسەکان»ێ و «چادٚرگا»ش دا وەروو تۆپا. یەرێ ڕوێ دمای ئی گرمە و هۆڕەیە، سۆفی نەزرەلی بەگ ئەمرەو خودٚایش کەردٚە. شێخی فەرماوا بێ: زاڵەش ترەکان. تۆپەو چێشی، تەقێ، بەڵام کەسی نەکۆشێ تەنیا ناڵە و نرکەش زل بێ! پەنەش واچێنێ: قمبزیە. چیدٚمای چوار پەنج نەفرێ کەرێ بیێ، واتشا هەوا و گرمەو ئا تۆپێ کەڕێ کەردٚێنێ!
ئارتەشوو عۆسمانی ئاما و لوا و نەوسوودٚەش گێرتە و پڕاوە ڕوەو هیروێ. پادارێ ڕەمای و لوایرە «کۆلیندەشت» و «هەزارپەسە» و بێ پایێچ مەنێ جیا. دمای چندٚ ساڵا بەدٚ بەختی و چەکمە سەری و نەدٚامەتی، جەنگ تەمامیا، بەڵام گرانیێو کەوتەرە، خودٚا پەنا بدٚۆ، تاتە ڕەحم نەکەرێ بە ئەولادٚی. پاسە گێڵنێوە و واچێ: لاو ئێمە خاستەر بیەن. گژ و گیواو و تفی و نوونوور و بەلوێ و ئی چێوێ بیێنێ.
-ئەرێ ئانە ساڵەکا ۱۲۹۶ تا۱۲۹۸ ی بیەن. بەڵام ئیسە دنیای فەرقش کەردٚەن و هەرگیز ئا کارەساتە ئەواخوا نمەبۆوە. دنیاو ئارۆی تەوفیری فرەش کەردٚەن. ئارۆ دەڵەتەکێ نمازا ئەپی لەونە خەڵکی دووچاوو ئاورای و تەژنای بۆ. ئینە مۆعەلێمەکەیما وات پەیما. ماچۆ نگەرانێ نەبیدێ ئی دەردٚێچە تەمامیۆ و دنیایچ وەش بۆ. ماچۆ مشیۆ ئۆمێدتا بۆ و بە یەکتری کۆمەک کەردێ و بێهداشت ڕەعایەت کەردێ و هۆشتا لاو پاکی و پۆختەیەو بۆ.
-ئەرێ عەرزتا کەرێنێ، ئیجا خۆ فەتە هەر فێر بیەن قسێ بڕۆنە دەموو یۆی. سەدٚ کەڕەتێ لالۆ حەمەی پەنە واتەن فەتە گیان وەختێو یۆ قسێ کەرۆ بازە با تەمامنۆش، ئاوەختە نۆبەو تۆیچ گنۆ. هەرتا دڵت پەون دوە و دڵوو وێت هاڵی کەرە. بەڵام کەم گۆترەی قسێ پڕتافنە.
-ئەدٚا گیان هەرکەی نۆبەو من گنۆ کەس گۆش نمەگێرۆ. لالۆ حەمە کە قسەکێ وێش تەمایای نەمۆ کڵاوو مشکیەکەیش و هۆرزۆ ملۆە. ئانێچتا کە گووشیتا نیا وەروو وێتارە گندێ قسە کەردٚەی و ئانیچە کە گووشیشا هەن هەر چەمشا ئینا گووشیەکەیشاوە. دەیتر من چکۆ قسێم پەی بەیا و پەی کێ قسێ کەروو.
-دەی خاسا، ڕۆڵە تۆ ڕاس ماچی! ئێتر کوڵە مدٚەی…خۆ گەورەو گۆلانەی نەمەنەن. تۆ بیەش پەی هەر ئنەش مەنەن بنەمۆم وەنە. خۆ من دەسوو تاتەیتەو کەلاوم کەردٚەن، تۆیچ مەبە باروو سەربارا. ئەوەرۆ چەنی عەبەی کۆچێو دەوەن بەئاشما بی. وەروو عەیبەی نەبیایا و نەواتایشا ئەچی سەری پیریەو ئی ژەنێ چێشش وەنە قۆمیان، ئازێنێش جیا و نانەش چەنی نەکەرێنێ دوێ لتێ، دەی گیان شش حەوت نەفەرێ دلێ یانێوی گۆلانەیەن بیێنمێنە یۆ.
هەر یۆ گیواوو کوێویشا گەرەکا. یۆ گەرەکشا فووتباڵ تەماشە کەرۆ، یۆتەریچ ماچۆ ئا فیلمێو وزدێ سەر و عەبەیچ ماچۆ هەر وزدێش ئێخبار. بزانمێ دنیا بڕیۆ چێ بارێوەرە. دە ی ماچوو پیاکە، ئێخبار سەعاتێو و دوێ و یەرێ. ئێتر نۆبەیچ بۆ نۆبەت تەمامیان. دەی گیان ئادٚ قسێ هەر قسێ وێشەنە. دڵش پەون واچۆ، چوون من نانتا پەی بەر ماروو، هەرچی واچوو مشیۆ پاسە بۆ!
….
وەلی فەتاحی ۹۸/۱۲/۱۶
درباره این سایت