کەلەبەروو شێعرا(۱٦٤)
(وەتەن)
لیباسی وەتەن پۆشام وە باڵام
ڕانك و چۆخە و کڵاش و پاڵام
یاسای قەد٘یمیم فەرامۆش نەکەرد
زەحمەت کێشای دەور هەرگیز نەناڵام
هەوای فەرح بەخش کێو کەشانی تۆ
خاڪی ئاسانەت وە دید٘ەم ماڵام
وەتەن پەی ئافەت ئەرزی وسەماوی
دەس وە دۆعای خەیر دەرگای حەق لاڵام
سارای دونیای دوون مەزرەعەی خەیاڵ
تۆمی وەفای تۆ ، چێوتەر نەڪاڵام
مەجنوون کۆی دوجەیل(سەعد) جە گاهۆڵ
بە بەرزی شاهۆ ڪۆساڵان باڵام
خەتای کەس نیەن سەرنویشتی وێم
کاڵای مەینەتان بڕیان وە باڵام
#سەعدوڵڵا _خەدیری
شنەو هەناسەیت شەماڵوو هیواین
وەشتەرین موژدەو وەهاروو ژیواین
یادٚت ئامێتەو یادٚم ڪەروونە
شەوان بە یادٚوو تۆوە مووسوونە
بە هیچ زوانێ وەسفت مەکریۆ
ئەڵماسێوەنێ بەهات مەدٚریۆ
ئەر سەدٚ پێوارنی بە یاساو دووری
دیەیت مەحاڵەن ، مەر بە زەرووری
بە یادٚوو تۆوە مرکێورە دڵم
ساچیانا چنی دووریەکەت، گوڵم!
دڵ تاسەو تۆشەن ،نیەن جوابت
ئاخ چن ئی دڵە بیەن ڪەبابت
چن شــەفا بەخشا وەشـەسیاییت
پەوکای مەمانیەو جە بێ وەفاییت
ئەر وەشەسیاییچ یەك لایەنە بۆ
هەریەر #تەڵاقم با "بایەنە" بۆ
سەدٚ ئەننەتەریچ دێوانەم زانی
هەر وەشەم مسیەی بە بەهاو گیانی
#سوهراب_مورادنیا_سیاوکام
۹۸٫۱۲٫۹ کۆچی ڕۆجیاری
قافیەو خەما
سۆزم نەمەنەن شێعرم و‌‌ەیلانا
دڵم سەرگەردان قافیەم وێرانا
هەناسەم بڕیان دانم کەش و کۆ
چناروو ئاواتیم چەمیانەو جه نۆ
بەردەنم دەروون هەزار بارێ خەم
تەمەلوول کەرۆ دڵەی پڕ ستەم
قەڵەم تووریان جه دەس هاوارم
سایەو خەفەتی مدٚو ئازارم
نەمەنەن تەوان ، تاقەتم زارا
بارم سەنگینا و رۆشناییم تارا
وەشی و شادٚی و زەوق جه لام کەردٚەن بار
سیاویم پۆشان وێنەی تازیەبار
به زاهێر مشیۆم چەنی وێم سازوو
به باڵاو خەمی دەفتەری ورازوو
کز کز بنیشوو تا قامی قیام
خودٚاحافێزش بۆ دنیای بێ مەرام
سەبر و تەحەموڵ چەنیم ناسازا
قوڵەو قازانوو دڵیم بێ هازا
نمەی شێعرێوه مەڵهەم سازه بۆ
چنی باروو خەمام هامترازه بۆ
با به دڵ واچوو دەروونم تەما
تا خەفەتی با قافیەم خەما
#عەتا حەیدەری (خەمبار)
درباره این سایت