"خەسەخانه"
ئازیز نەپەرسای حاڵی پەشێوم
ها وەختەن که گیان بەیو وه لێوم
تیری مەهجووریت جەرگم پاره کەرد
ئەرواح جه وەتەن ، تەن ئاواره کەرد
پەردەی دڵ دڕیان، ساکێش ورازۆ
به تای زۆڵفی تو بەخیه موازۆ
سرۆمم عارەق سیمی خاڵی تۆن
بەندٚی شکەستەم به دەسماڵی تۆن
تەخت بەستەریم ئۆتاقی مەیلت
ڕازیم بەمەردەن گیان به تۆفەیلت
خاری هیجـرانت تەزریقـی باڵم
بیماریم پەی تۆن خەیلێ وەشحاڵم
دەرەجەی هوونم وەفا و مەیلی تۆن
ئەر مەیلت نەبۆ من هوونم جه کۆن!
ئازیز حەیاتـم قەیدی وەفـاتەن
بێ وەفات حەیات پەی من مەماتەن
شەربەتم ، شیشەی مینای بێ گەردت
ڪەرەم فـەرماوای تۆ به من وەردت
خۆ شەربەت نیەن ئاوی حەیاتەن
سەرچەمەی حەیات نەپای زۆڵماتەن
#سەعدوڵڵا_خەدیری
وەنەوشەی چنیا بە دەساو لەیلێ
چاییش شەفانە، فراوان خەیلێ
بەڵام بە باقە، ئەگەر وێش بارۆش
دەوای ئەرەستوو مەحاڵەن ماڕۆش
بە تایبەت ئازیز ئەر هەورامی بۆ
سڵام و سەفاش گیانی گیانی بۆ
دۆخەوا بارۆ بە چەمچەی داری
هۆشت بەرۆوە کزی و قەرزاری
نانەشانە بۆ و کێلانێ و چایی
کێ بۆ فاڕۆشۆ بە سفرەی شایی؟!
دەنگوو شمشاڵێ و شێعر و گۆرانی
وەشی گێڵۆوە پێسەو جارانی
#حامی_غەریبی
درباره این سایت