کناچێ شوانەی
مامام خودٚاگیان پارێزنۆش جە نەوەشی,باوەڕش پاسنە بێ پیا مشیۆ هۆنەرێو بزانۆ. ئارۆ وەختوو نان واردەو نیمەڕۆیەنە واچێ تۆ مشیۆ هەرمانێوە مسی.هەرمانێوەی خاسە,بتاوی چێوێو وەش کەری هەکە خەڵک کەڵکش چەنە هۆربگێرۆ. چۆ تاشی بۆ, ئاسن گەری بۆ, بە هەڕە چێو وەش کەردەی بۆ و
پەی پیێوی جوانی پێسەو تۆ شوورەیا هۆنەرێو نەزانۆ. تا یاوانی ئی سنحێ چ هەرمانێوەت کەردێنە؟ چێش تاوی وەش کەری کە نیشانێو زەوقوو هۆنەریت بۆ؟ میسال تاوی مێزێوی سادە وەش کەری؟سەندەڵیوە وەشە کەری؟یا قاڵیوە چنی؟ قسێ کەرە, چ هەرمانێوەت چەنە بەر مێ؟ بە تەماشێوی مەلامەت بارەۆ وڕە بیەنە میاچەمام. وەختێو پەشێویش دیانی واتش: خەیاڵ کەری نویسەرەنی؟ نمەزانوو گاهەزیچ بی.
بێژگەم جگەرە کێشتەی چێش کەری؟ دایمە دووکەڵ هۆدەکەت گێرتەنشەرە. باوەڕم ئینەنە نویسەری پەی تۆ کار نیا. مشیو هۆنەرێو جە ژیوایتەنە وزی کار. چێوێو وەش کەری دەردەو خەڵکی وەرۆ. بنیادەم بتاوۆ وینۆش و کەڵکش چەنە هۆر بگێرۆ. ئەگەر عورزەو ئا کارەیتە نیا , لوە هەرمانێوە تەرە یاد بگێرە.
ئاوەختە بە پەرمای وێشەرە دەسش کەرد بە ئەوەگێڵنای داستانێوێ.
جە ویەردێوی دوورەنە پادشاو ئێرانی کۆڕێوی هەرزەکارش بێ, کۆڕەکە دڵش گیروودەو کناچێوۆ شووانەی بۆ نمەتاوۆ چەنەش دڵ کەنۆ بە جۆریو کە وەرموو ئوقرەو ئارامش نمەمەنۆ پەنە. کۆڕەکە مەجبوور بی لوا پەی لاو تاتەیش و ڕازەو دڵیش پەی درکنا. واتش: گرفتارو کناچێ شووانەی بیەنا, ئاواتی گەورەم ئانەنە چەنیش زەماوەننە کەروو. پادشا کۆڕەکەش فرە وەشش سیێ. واتش: ڕۆڵە گیان ئەجۆ هۆشت شیەنە تۆ کۆڕوو شایەنی , دماو من تاج وتەخت گنۆ دەست. چەنی ڕازی بی کناچێ شووانەی بۆ بە خاتوونەت ؟
کۆڕەکەی واتش: تاتە گیان ڕاس فەرماوی بەڵام چێش کەروو ئی کناچێمە وەشە مسیۆ بێ ئادێ نمەتاڤو بژیوو.
پادشا زاناش عەشقو وەشەسیایی کۆڕەکەیش عەشقێوی راستەقینەن و جە دڵەو هۆرخێزیان, واتش: خاسا پەی ئا کناچێ پێخامێو مکیانوو. نۆکەرێوش چڕی , واتش: لوە لاو کناچێ فڵانە شووانەی , واچه کۆڕو پادشای عاشقت بیەن گەرەکشا چەنینت زەماوەننە کەرۆ. نۆکەرە لواو کناچێش دیەو واتەش پەنە شانسی ڕووە کەردێنی وەنە, کۆڕو پادشای عاشقت بیەن , گەرەکشا چەنیت زەماوەننە کەرۆ.
کناچەکێ بە ئەهوەننیەو واتش: کۆڕو پادشای چ هەرمانێوە مزانۆ؟ نۆکەرەکە تووڕە بی واتش: چێش ماچی هۆشت ئینا وێتەو, ئاد کۆڕو پادشایا, کارو چێشی؟ هەرمانەو چێشی؟ئاد وێش میراو وێش مەڵڵا. بەڵام کناچەکێ بە دڵنیایی واتش: من بە کابرێوی کە هەرمانێوە نەزانۆ شوو نمەکەروو. لوە واچەش پەنە ئەگەر گەرەکشا شووش پەنە کەروو مشیو هەرمانێوە مسۆ. نۆکەرەکە جووابەکەش بەردەو پەی پادشای. پادشا کۆڕەکەش چڕی و بەسەرئاماکەش پەی گێڵناوەو واتش: ئیسەیچ گەرکتا هەر ئا کناچێ باری؟بدیە تۆ کۆڕو پادشایەنی بەڵام ئادە هیشتای پەڵپێ گێرۆ. کۆڕەکە کۆچێو لوا فکرێرەو واتش: بۆنەو ئادێوە ملوو هۆنەرێو مسوو. ملوو حەسیر چنیەی خاس فێر بوو دماوە چەنیش زەماوننە کەروو.
کۆرەکە هەر ئا ڕۆە لوا پەی لاو ئۆساو حەسیر چنیەی. کەمتەر جه یەرێ ڕۆانە فووت وفەننو حەسیر چنیەی ئامانە دەسش. وەختێو بە هەرمانەو وێش متمانەش پەیذا کەرد حەسیرێوەی وەش ڕەنگو وەش تەرحەش چنیەو بە خەڵات کیاستەش پەی کناچەکێ. کناچەکێ وەختێو حەسیرەکێش دیە, چەنی نۆکەرەکەی ئاما پەی قەسروو پادشای. جەژنێوەی گەورێشا ڕێکە وستەو کۆڕوو کناچە یاوێ بە یوی.
مامام کۆچێو بێ دەنگە بیەو واتش: دماو چن ساڵا کۆڕەکە کوڵانێوەو بەغدایەنە ویەرای ویەرێ, کەباب خانێوی پۆختەش چەم پەنە کەوت. وەختو نیمەڕۆی بێ لوا چووەر پەشتو مێزێویەنە نیشتەرە. ئی کباب خانە هێنو جەردا بێ. مجیێ ملشەرەو گێرتشا و کەردشا زیننان. خەڵکێوی فرەشا گیرتەبێ. دزەکێ هەر ڕۆێو پیوب چاخ کوشێنێ و گۆشتەکەیش دێنی بە ئەویشا, پی جورە سەرگەرمیشا پەی وێشا وەش کەردەبێ.
کۆڕو پادشای ئەنذامێوی باریکەڵەش بێ و کەسیچ نەژناسێش. کەس کارش سەرشەو نەبێ, کۆنجێونە نبابێشارە.
ڕۆێو کۆڕەکە بە جەردەکا واتش: من هۆنەرێوم هەن تاودێ چەنەش کەڵکی عاڵ هۆر گێردێ. من حەسیرێ فرە وەشێ چنوو. کەرەسەم پەی باردێ تا حەسیرێوەی عالەتا پەی چنوو, پەی وێتا بورەشدێش.
جەردەکێ بەڵایرێو نەیجێ وکەرەسەو حەسیر چنیەیشا پەی ئاورد. کۆڕەکە ماوەو یەرێ ڕۆانە حەسیرێوەی وەش ڕەنگوو تەرحەش چنیە . کۆڕەکەی واتش: پادشا چی جورە حەسیرا وەشش مەیۆ. ئەگەر وینوش زەڕێوی فرەتا خەڵات کەرۆ.
جەردەکێ بە وەشیەو حەسیرەکێشا بەردە پەی لاو پادشای. پادشا وەختێو حەسیرەکێش دیە, زاناش ئینە هەرمانەو کۆڕەکەیشەنە, حەسیرەکێش نیشانەو وەیوەکێش داو واتش: مەرەجیوم ئینە هەرمانەو کۆڕەکەیمەنە. کناچەکێ تەماشەو حەسیرەکێش کەردە, دیش شووەکەیش ژیرانە یاگو زیننانەکیش ئەرمانان. پادشای سەروازێ فرێش کیاستێ کۆڕەکەو زینانیەکێشا ڕزگارێ کەردێ و جەردەکێشا گێرتێ. کۆڕەکەیچ دماو ماوێوی دەردێسەری و سەختی گێڵاوە پەی لاو تاتەیش و ژەنەکێش
درباره این سایت