چوار دانێ کرۆنێ نویسەر رسول موحدیان جە هاڵیگای قەسالەین(فضای مجازی ) هۆرگیڵیانەو بە زوانی هەورامی/کوورش یووسفی
چوار دانێ کرۆنێ نویسەر رسول موحدیان جە هاڵیگای قەسالەین(فضای مجازی ) هۆرگیڵیانەو بە زوانی هەورامی
دماو شەس ساڵا وەردەسی و کار و زەحمەتی چی دنیانە بیانی ساحیبوو چوار دووکاناو دەسێو یانا.
دوێ کوڕێ و دۆێ کناچێم هەنێ هەر چوار لوێنێ سەرو یانەو وێشا و من و ژەنەکێچم پێوەرە ژیومێ.
وێم یۆ جە دووکانەکا بەروو ڕاوەو ئەو یەرەکەیچم دێنێ کرێها. وەختێو کرونا ئامانە ئێران ژەنەکێم وات واز بارە،مەلە پەی دووکانی،خەتەرا با تووشوو ئی نەوەشیەیە نەی.بەڵام من گوشم نەدارانە.
ژەنەکێم بۆنەو ئانەیەو سەلەمنۆم پەنە نەلوو پەی دووکانی، وێرەگانێو چاشتی فرێش کەردێ بێ زاڕوڵەکێما چڕیێ بێنێش بەیا پەی یانەی تا من جە لوای پەی دووکانی پەشیمان کەراوە . من هاگام چینەیە نەبێ،نزیکەو عەیدی بێ مۆشتەریێ فرێم بێنێ ،دێر ئامانیەو پەی یانەی.
ژەنەکێم دابێش پێوەرە و تەمیێبێرە وچاشت و میوێوی فرەش نیابێرە.پەرسام ئینە گرد جێشا؟مێمانێما هەنێ؟ چی دانت پێوەرە؟ ئەجو دوت مجیان؟
واتش:بنیشەرە با مانیایت سەیۆوە،نانەکەیت وەرە جا ماچوو. دماو نان واردەی واتش:ئارۆ زەنگم دا پەی زاڕۆڵەکا واتم وێرەگا بەیدێ پەی یانەو وێما، تاتەتا گوشم نمەدارونە چی باروودوخەنە هەر ملای ملو پەی دووکانی،تەرسوو کرونا گێرو.گردیتا بەیدێ بەشکووم سەلەمنمێ پەنەش ئیتر نەڵو. بەڵام هەر چوار زەنگشا داو پەڵپێوەشا ئاوردەو واتشا نمەتاومێ بەیمێ.
واتم دەی ئینە ناڕەحەتیش گەرەک نیا،حەتمەن هەرمانەشا یێنە.
واتش هەرمانەو چێشی،ئاد٘ی جە تەرسەو ئینەیەنە تووشوو کرونای بیەبی نامێ.
وێچم دڵم تەمیارە،دڵوو وێمەنە دەسم کەرد بە دژمان دای بە کرونای و ئی وەزعێ و
وەرو دڵەورکێو ژەنەکێم دووکانەکم بیناو بێ ئانەیە زاڕۆڵەکێ بزانا لوایمێ پەی جەزیرەو کیشی. دماو چن ڕۆا کوڕە گەورەکەیم زەنگش دا پەی ئەد٘ێش واتش:ماماو خانمێم چەمش عەمەڵ کەردەن بەیدێ با بڵمێ پەی لایش.
ژەنەکێچم بە قینیەو واش: ئینای فکرو ماماو ژەنەکێتەنە، ئی چی هەواڵوو تاتەیت نمەپەرسی؟ کورەکەیم وات: چێش قومیان؟ ئاد٘ێ وات:تاتەت کروناش گێرتەن و ئینە چن ڕۆێن ئاردەنم پەی بیمارستانی.حاڵش خاس نیا ڕەنگا دوێ یەرێ ڕۆێ زیاتەر نەمەنۆ.
کوڕەکەیم کوچێو ناڕەحەت بی و واتش:خۆ نمەکریو ئێمە بەیمێ لاش،مشیو چێش بکەرمێ؟ژەنەکێم وات:ئەگەر عەمروو خود٘ایش کەردە وێشا ئەسپەردەش کەراو فاتێحە وەنیچ خۆ قەد٘خە کریان و.
منیچ دەسم کەرد خوای و واتم خاست کەرد ، با بزانمێ چێش کەرا.زاڕوڵەکێ جار جارێو زەنگ دێنێ و هەواڵوو من پەرسێنێ. هەفتێو چا مەنێمێوە،ئاخر ڕۆ وەختێو ئامایمێ ژەنەکێم واتش تاتەتا مەردەن و وێچشا ئەسپەردە کەرد.
درباره این سایت